A AMTEGA dará un novo impulso á transformación dixital da xestión pesqueira da Consellería do Mar
luns, 9 de agosto do 2021
A
Consellería do Mar e a Axencia para a Modernización Tecnolóxica de
Galicia veñen de dar continuidade ao acordo asinado en 2019 para o
financiamento de sistemas de promoción, mellora da comercialización
e rastrexabilidade (trazabilidade) dos produtos do mar. Farano
optimizando a transformación dixital das súas xestións pesqueiras
cun investimento de preto de 4 millóns de euros. Entre as
iniciativas concretas previstas inclúese a activación de
plataformas para permitir a xestión informatizada e “dar resposta
ás necesidades de diferentes departamentos da Consellería do Mar”.
A
addenda do devandito acordo de 2019 foi asinada pola conselleira do
Mar, Rosa Quintana, e a directora da AMTEGA, Mar Pereira. Esta
prolongación (vixente até xuño de 2023) posibilitará ampliar até
os 3,7 millóns de euros o financiamento destinado a optimizar os
sistemas de información da Administración galega vencellados coa
xestión pesqueira.
Como
resultado da ampliación do acordo desenvolveranse sistemas de
información e xestión das axudas financiadas polo Fondo Europeo
Marítimo e da Pesca (FEMP) co obxectivo de dar soporte á xestión
das subvencións. “Esta acción”, sinalaron, “incluirá
ferramentas para a tramitación electrónica de todos os
procedementos administrativos vencellados con esta actividade así
como un módulo de explotación de datos que dea soporte ás
necesidades de información particulares”.
Tamén
fixeron saber que amais do portal de difusión das políticas
financiadas e xestión das axudas do FEMP, o acordo posibilirará a
creación dunha aplicación de xestión das autorizacións de
primeira venda de produtos do mar e un sistema de xestión dos
mecanismos previstos pola Organización Común de Mercados (OCM) así
como o soporte das denominacións comerciais asociadas. A eles
engádese un sistema de apoio na tramitación dos procedementos
relacionados cos establecementos de acuicultura como as concesións,
autorizacións, outorgamentos, prórrogas, traslados ou
habilitacións.
O
convenio tamén permite dispoñer de ferramentas de xestión da pesca
fresca e conxelada, que inclúe o acceso en mobilidade aos documentos
de rastrexabilidade dos produtos do mar, e o desenvolvemento de
mecanismos de promoción destes produtos a través de portais e
plataformas asociadas, aplicacións e redes que acompañan ás
campañas, como a vencellada á marca de calidade pescadeRías, de
onde se non?.
O
acordo tamén terá repercusión nos servizos dixitais doutras
xestións como a planificación dos eventos feirais, o rexistro de
buques da comunidade autónoma, o sistema de licenzas da pesca
deportiva ou distintos sistemas de carteis dixitais para a xestión
remota de contidos de promoción de produtos do mar, entre outros.