A Biblioteca Virtual de GaliciaDigital alcanza os 300 títulos
mércores, 29 de marzo do 2023
A
Biblioteca
Virtual de GaliciaDigital, posta en marcha hai 7 anos publicando
libros esgotados ou inéditos para poñelos ao dispor dos posíbeis
interesados con independencia de onde residisen, contribuíndo tamén
á súa difusión, vén de superar a liña dos 300 títulos.
Cunha
periodicidade aproximada dun libro por semana, a colección chegou xa
á devandita cifra coa publicación da obra Lugo
a través do tempo, de Eduardo Ochoa (Grupo
Fotocinematográfico Fonmiñá).
“O
noso catálogo”, explican dende GaliciaDigital, “segue a medrar
sen présa pero sen pausa, presentando unha oferta xa ampla de poesía
ou prosa, de ensaio ou reportaxe, en galego ou castelán, totalmente
gratuíta; para todos e para sempre”. E engaden: “Estamos
plenamente satisfeitos pola formulación e o traballo desenvolvido,
queremos deixar constancia de agradecemento sen límites a autores e
autoras que nos autorizan a reproducir as súas obras, e igual
recoñecemento para todos os internautas que cada día entran na
Biblioteca Virtual de GaliciaDigital para descubrir novas
publicacións, antigas ou recentes, que forman parte esencial da nosa
oferta-achega á infraestrutura dixital do país”.
Dende
GaliciaDigital aproveitaron a consecución dos 300 volumes para
lanzar un convite a todas as persoas interesadas que queiran dar unha
nova dimensión divulgativa ás súas publicacións a que se poñan
en contacto coa plataforma a través do correo
correo@galiciadigital.com.