A Escola de Telecomunicación da UVigo conmemora o centenario dos seus estudos
venres, 24 de abril do 2020
A
Escola
de Enxeñaría de Telecomunicación da Universidade de Vigo sumouse
este venres 24 de abril á celebración da Enxeñaría de
Telecomunicación, que festexa estes días, contra vento, marea e
crises sanitarias, o centenario da súa creación. A escola conmemora
estes cen anos de historia poñendo de relevo “a importancia das
telecomunicacións na sociedade actual”. En palabras de Íñigo
Cuiñas, director da escola, “a evolución da titulación vai moi
en paralelo á evolución da tecnoloxía, e con ela, da sociedade
neste século”.
O
Colexio Oficial de Enxeñeiros de Telecomunicación e a Asociación
Española de Enxeñeiros de Telecomunicación, en colaboración cos
centros universitarios que imparten o título de Mestrado
Universitario en Enxeñaría de Telecomunicación, entre eles o da
Universidade de Vigo, tiñan previsto unha serie de eventos que
debido ao coronavirus tiveron que ser aprazados. Porén, a crise
sanitaria actual non impide lembrar esta efeméride e destacar como
esta “non celebración” é tamén unha “celebración” do dito
aniversario, explica Cuiñas, salientando que “grazas á
telecomunicación a nosa sociedade está a manter unha actividade
académica, laboral e social nun período no que non debemos saír
dos nosos fogares”.
Unha
ollada ao pasado e ao presente
A
Escola de Enxeñaría de Telecomunicación da Universidade de Vigo,
lembra o seu responsábel, naceu en 1985 como Escola Técnica
Superior de Enxeñeiros de Telecomunicación, daquela adscrita á
Universidade de Santiago de Compostela no Campus de Vigo. “Foi un
centro creado para impartir unha única titulación, a de Enxeñaría
de Telecomunicación, que daquela só se impartía na Universidade
Politécnica de Madrid e na Universidade Politécnica de Cataluña”,
comenta Íñigo Cuiñas. A creación desta escola en Galicia, subliña
o seu director, “supuxo a primeira oportunidade para formar
enxeñeiros e enxeñeiras de Telecomunicación fóra dos grandes
polos económicos e políticos de España, supuxo o achegamento das
novas tecnoloxías e da modernidade a Galicia e ao noroeste
peninsular en xeral e unha oportunidade que a industria foi quen de
aproveitar desenvolvendo capacidades e proxectos que non existirían
noutras circunstancias”. Nos primeiros anos trala súa creación, a
EE de Telecomunicación “foi un fervedoiro de novas, de ideas, de
proxectos, de iniciativas...”. O paso do tempo, sinala, “trouxo a
madurez e con ela un pouso de experiencia sumado á iniciativa e a
capacidade que tiña inicialmente”.