A OCU pon a exame o Súper de Amazon: promete pero hai cousas que mellorar
venres, 9 de outubro do 2015
Amazon está a abrir unha
serie de tendas en liña que malia que nun principio se meten de cheo
en sectores que non lle son propios nin naturais, semella que van
collendo certo pulo no mercado dixital. Estas tendas, agrupadas baixo
o nome común de Súper Amazon, van chegando cada pouco (recentemente
falamos dos establecementos de alimentación e limpeza postos en
marcha en España e hoxe
mesmo da apertura en Estudos Unidos dunha tenda en liña de
artesanía) e subministrando diferentes partes dun conxunto
final. Malia este fornecemento non integral, os usuarios xa comezan a
facerse unha opinión. Dende
a Organización de Consumidores e Usuarios veñen de avaliar con lupa
esta nova póla de actividade de Amazon. Na súa opinión, o
supermercado en liña promete, “pero debe mellorar”. De feito,
sinalan, “malia ter moitas vantaxes, non semella aínda un competir
real”, polo que é de supor “que o mellor pode estar por chegar”.
Para a organización,
malia o potencial que amosa, a iniciativa de Amazon non é quen (polo
de agora) de quitar mercado nin aos outros portais web especializados
no mesmo nin ás tendas físicas de alimentación. Polo tanto, engade
a OCU, trátase dun esforzo meritorio que aposta en boa medida polo
comercio local (mesmo polo comercio galego) pero ao que lle falta
aínda o empuxe preciso para ser “unha alternativa real”. E
detalla a organización: “O novo supermercado de Amazon é
prometedor e ten puntos moi positivos, pero aínda lle falta
incrementar o número de categorías de produtos para poder ser unha
alternativa completa para un consumidor que queira mercar ese tipo de
artigos na Rede”.
Asemade, para os
consumidores unidos tamén amosa unha serie de eivas no que se refire
á ordenación das referencias para que os clientes sexan quen de
atopar os produtos sen necesidade de empregaren o buscador. “Para
isto”, explica a OCU, “Amazon poderíase servir de sistemas que
xa aplican outros establecementos en liña; de acadalo seríalle máis
doado atraer a máis fabricantes que queiran vender os seus produtos
nesta popular plataforma dixital”. Por agora, conclúen, Amazon
fica nunha opción máis para mercar artigos envasados e con
caducidades longas.