A Xunta prevé chegar en novembro co seu proxecto de reclamación dixital a un cento de supermercados

O conselleiro de Emprego e Comercio, José González, acompañado polo director xeral de Comercio e Consumo, Gabriel Alén, e pola xerente do Instituto Galego do Consumo e da Competencia (IGCC), Sol Vázquez, visitou en Ourense, este xoves 31, un dos establecementos adheridos ao proxecto piloto de reclamación dixital a través dun código QR.
Segundo destacou o conselleiro, a florería El Jardín de Juan XXIII trátase do primeiro comercio da provincia ourensá con este sistema, que se está a estender polo territorio prevendo chegar neste novembro non só a establecementos coma este senón tamén a un cento de supermercados de Galicia.
Explicou tamén que en 2025 o obxectivo é chegar ao sector servizos (subministro eléctrico e telefonía), que son “os máis numerosos en materia de reclamacións da cidadanía”. Así o salientou o titular de Emprego, apuntando que o que se persegue é “axilizar o proceso de reclamacións e garantir a protección dos dereitos das persoas consumidoras e usuarias, como complemento das actuais follas de reclamación existentes nos establecementos”. O obxectivo, dixo, “é avanzar na simplicidade, axilidade e eficacia do proceso de reclamación en beneficio dos consumidores, ao tempo que se ofrece ás empresas unha ferramenta áxil de comunicación coa súa clientela e evitando o feito de ter que solicitar expresamente a entrega da folla de reclamación, podendo facerse unha vez fóra do comercio ou mesmo na casa”.
Grazas ao novo sistema, as reclamacións poden presentarse de maneira dixital a partir do escaneo dun código QR que dirixe a un formulario virtual no que cumprimentar os datos persoais e o motivo da reclamación, que será remitida de maneira electrónica á empresa.
De forma automática, recíbese un correo electrónico dando conta do día e da hora da presentación da reclamación e indicando que se abre un prazo dun mes para que a empresa remita contestación.
Transcorrido o prazo dun mes sen obter resposta ou de ser esta insatisfactoria, a persoa consumidora poderá dirixirse directamente ao Instituto Galego do Consumo e da Competencia e presentar unha nova reclamación a través dun enlace que xa se inclúe no propio correo e que recolle os datos cubertos na primeira reclamación ante a empresa.