A galega TokApp presenta en SIMO o seu servizo para solucionar pagos no colexio
martes, 13 de novembro do 2018
TokApp
School, a ferramenta galega de comunicación para contornas
escolares (nas que favorece a solución de incidencias e achega
rapidez e eficacia no intercambio de datos, contidos, mensaxes), está
este outono estreando unha importante novidade na súa listaxe de
funcionalidades. Trátase dun novo servizo destinado a permitir ás
nais e aos pais a realización dos diferentes pagos relacionados co
colexio dos seus fillos. Por exemplo, todas aquelas contías ligadas
a excursións, comedores ou transporte. A nova funcionalidade
estrearase en SIMO
Educación, o salón de tecnoloxías docentes que se celebra esta
semana (dende hoxe até pasadomañá, no IFEMA de Madrid).
Segundo
explican os impulsores de TokApp, poñéndonos na orixe da nova
funcionalidade, “poucas cousas traen máis dores de cabeza que os
pagos pendentes ao colexio, que, malia que adoitan ser cotas
pequenas, seguen a discorrer por vieiros tradicionais que obrigan a
desprazamentos, recordatorios e incomodidades”. Ou sexa, que se
seguen a realizar por medio dos fillos, á vella usanza, ou de
maneira presencial na escola por parte da nai ou do pai.
A
nova ferramenta consiste basicamente na solución ao devandito ao
problema, integrando un novo sistema de pagos nas mensaxes, e
facéndoo de maneira simple, sinxela e cómoda.
Segundo
informan os responsábeis de TokApp School, que a día de hoxe
conecta máis de 3.000 centros educativos cunha comunidade de nais e
pais formada por 1.200.000 membros, o sistema posto en marcha é “tan
intuitivo coma a propia TokApp”. De feito, trátase do seguinte: o
colexio envía unha mensaxe na que pode engadir a opción de
solicitar pago, e para isto, só ten que colocar o importe total que
necesita e unha calculadora xa divide canto se lle pide a cada pai
(proceso que tamén se pode facer á inversa). Logo, a mensaxe chega
decontado á familia e esta decide se pagar ou rexeitar. En ambos os
casos o colexio ten un historial cun rexistro dinámico dos pagos
para poder organizalo. Mesmo para aqueles que pagan en efectivo.
Tras
deste desenvolvemento, houbo “moitos meses de test con centros
reais para atopar a forma perfecta de solucionar o caso de pagos”,
aseguran dende TokApp, engadindo que “o resultado é unha solución
integrada nunha plataforma totalmente familiar para os centros”.