Almofada con tecnoloxía Bluetooth que che libera do uso dos mans

mércores, 21 de marzo do 2007 Fernando Sarasketa

No salón CeBIT deste ano e, como en calquera outro salón, as cousas que finalmente atraen máis a vista dunha boa parte dos visitantes son as que mesturan a tecnoloxía máis punteira con obxectos que xa empregaban os nosos bisavós. Un exemplo deste tipo de combinacións sería a bañeira con home cinema (que existe) ou o mandil sen mangas cruzado con conexión satélite (que non existe, polo menos que se saiba). Nesta liña vai a almofada da que falamos neste texto, un trebello que visto dende arriba non ten nada de especial pero que se esculcamos de preto e dende as beiras ofrece probablemente o mellor de si mesmo, ou polo menos o máis innovador. É dicir: é aí onde están as cousas que che permiten empregalo coma se fose un mans ceibes para o móbil.
Inclúe un micrófono e uns altofalantes para establecer conexión co terminal a través de tecnoloxía Bluetooth. Ou sexa, que o aparello serviría para liberar ós móbil-adictos do feito de ter que interpoñer o teléfono entre a orella e a almofada, liberándonos un pouco do risco de coller cabaleiros no pescozo ou atrofias musculares de por vida nos brazos. Conclusión: ideal para quen vive e durme só, pero pouco recomendable para quen o fai acompañado. Se cadra a tecnoloxía da comunicación segue a dar pasos cara a onde non debería dalos: a incomunicación.

PUBLICIDADE