Amazon presenta novos dispositivos Kindle

xoves, 6 de setembro do 2012 Marcus Fernández


O Kindle Paperwhite preséntase como mellor eReader do mercado

Esta tarde Amazon ofreceu unha presentación destinada a amosar os novos produtos da familia Kindle para EE.UU., que supón unha reestruturación total dos lectores de libros electrónicos e tablets da compañía, tanto en prezo como en prestacións. Para comezar, o vindeiro 14 de setembro Amazon baixará a barreira de entrada para os eReaders Kindle, quedando o máis básico en 69 dólares, aínda que os afeccionados á lectura posiblemente preferirán optar polo novo lector Kindle coñecido como Paperwhite, en referencia á súa nova pantalla que mellora un 62% a súa resolución (chegando aos 212 puntos por polgada) e un 25% o contraste, á vez que incorpora iluminación frontal, sendo o primeiro eReader no mercado en incorporar esta tecnoloxía de pantalla. Porase á venda o 1 de outubro a 119 dólares no seu modelo con Wi-Fi e a 179 dólares no seu modelo con 3G.


O Kindle Fire HD é a proposta coa que Amazon parece querer facer fronte a Apple grazas a uns prezos agresivos e a multitude de contidos

O tablet Kindle Fire tamén se renova, incorporando o dobre de memoria RAM, un procesador máis rápido e unha batería de maior autonomía o que non impide que baixe o seu prezo ata 159 dólares a partir do 14 de setembro, data na que chegará o produto que ocupará realmente o seu lugar, o Kindle Fire HD 7, que por 199 dólares (con 16 Gb de almacenamento) tamén ofrecerá unha pantalla de 7 polgadas (cunha resolución de 1.280 x 800 píxeles), unha batería cunha autonomía de 11 horas e que vén a ser o irmán pequeno do produto estrea da presentación desta tarde, o Kindle Fire HD, que presume dunha pantalla de 8,9 polgadas cunha resolución de 1.920 x 1.200 píxeles, cámara frontal de alta definición, procesador OMAP 4470 que aseguran que supera en velocidade ao nVIDIA Tegra 3, altofalantes estéreo, 16 Gb de almacenamento interno e un prezo de 299 dólares, o que podería servirlle para competir co iPad. Tamén contará cunha versión con conectividade LTE (4G) e 32 Gb de almacenamento interno a un prezo de 499 dólares.
O Kindle Fire HD 7 estará dispoñilble en capacidades de 16 e 32 Gb, mentres que o Kindle Fire HD terá modelos de 16, 32 e 64 Gb, atendendo á demanda de maior capacidade de almacenamento en dispositivos con pantallas de alta definición (pois os contidos multimedia ocupan considerablemente máis en HD). Os novos tablets tamén contan con conectividade Bluetooth e con saída HDMI, permitindo así conectalos a un televisor para amosar na grande pantalla fotografías e vídeos.
Polo momento descoñécense os plans de Amazon para traer os novos dispositivos a España, sendo de agardar que desta volta si comercialicen no noso territorio os seus tablets, pois a semana pasada estrearon a Tienda Apps, o que enténdese como un indicio do desembarco español dos tablets Kindle Fire (que xa teñen confirmada a súa comercialización no Reino Unido).
ACTUALIZACIÓN: Amazon venderá o Kindle Fire en España por 159 euros, o Kindle Fire HD 7 de 16 Gb por 199 euros e de 32 Gb por 249 euros, aceptando reservas dende hoxe mesmo, e comezando a entregar os produtos o 25 de outubro. Do Kindle Paperwhite e do Kinde Fire HD con pantalla de 8,9 polgadas aínda non se coñecen os detalles da súa comercialización en España.