Amazon presenta unha cámara doméstica para facer selfies de moda

A introdución da intelixencia artificial de Amazon, Alexa, nos fogares a través dos altofalantes conectados Amazon Echo foi un grande éxito nos EE.UU., e agora queren repetir a xogada e probar se as persoas afeccionadas á moda e aos selfies poden tirar proveito dalgún trebello conectado, para o que lanzan mediante invitación Echo Look, unha cámara de mans libres que funciona en combinación cun asistente que pode comparar distintas aparencias do usuario para que poida saber cal é a vestimenta que mellor encaixa coas tendencias actuais ou que cadran máis coa persoa en cuestión.
A cámara do Echo Look pode controlarse mediante ordes de voz, de xeito que poderán dispararse instantáneas ou vídeos de curta duración, contando esta cámara tamén con iluminación LED, sensores de profundidade e desenfoque de fondo mediante visión artificial. Os contidos capturados por esta cámara disposta en vertical (pensando en rexistrar o corpo enteiro do usuario) poden empregarse para conformar un catálogo de aparencias e compartir as imaxes, aínda que a función máis interesante é o style check, un servizo que mediante algoritmos de machine learning e recomendacións de especialistas en moda achega ao usuario unha segunda opinión sobre o ben que lle queda unha vestimenta.
Esta solución pretende axudar ao usuario a descubrir novas marcas e prendas en función das fotografías que realice, e tamén atenderá a consultas por voz, servirá para reproducir música e outras funcións propias dos produtos da gama Echo, de xeito que este accesorio que podería parecer unha frivolidade conta con funcionalidades que axudarían a xustificar a súa compra. O seu prezo de venda é de 199,99 dólares, ou sexa, só 20 dólares máis que o altofalante Amazon Echo, o que podería dar a entender que o seu prezo estaría xustificado, aínda que realmente o produto co que tería que compararse sería o Echo Dot (á venda por 49,99 dólares), pois sería como engadirlle cámara a tal trebello.