Arrincan os preparativos para a Mobile Week Ourense 2022
venres, 4 de febreiro do 2022
A Mobile Week Ourense 2022 celebrarase en novembro na provincia de
Ourense, igual cá primeira edición do 2021. O
presidente da Deputación de Ourense, Manuel Baltar e o CEO de Mobile
World Capital Barcelona, Carlos Grau, lideraron o encontro de
traballo no que tamén estiveron presentes o reitor da
Universidade de Vigo, Manuel Reigosa; o delegado territorial da Xunta
de Galicia, Gabriel Alén; a presidenta da Confederación de
Empresarios de Ourense, Marisol Nóvoa, e o director de Transparencia
da Deputación, Fernando Suárez, entre outras personalidades.
Manuel Baltar destacou a importancia de que os axentes sociais,
económicos e administracións estean implicados no proxecto, así
como indicar que seguirán apostando por iniciativas que permitan
achegar a tecnoloxía á cidadanía ourensá para seguir loitando
contra a fenda dixital. Tamén afirmou que confía na organización
do proxecto despois do éxito obtido o ano pasado.
Por outra banda, Carlos Grau destacou a súa satisfacicón coa
acollida do proxecto na provincia de Ourense e o apoio tanto de
Manuel Baltar como do coordinador da Mobile Week Ourense 2022,
Fernando Suárez. Tamén indicou que para cumprir cos obxectivos
deste tipo de eventos, levarase a cabo unha organización e
adaptación dos contidos de acordo cos perfís clave da provincia
(persoas maiores, nenos e pemes). “Estamos nun momento no que as
competencias dixitais e o coñecemento da tecnoloxía son un elemento
básico para moitos dereitos, dende o punto de vista da educación,
da saúde ou da mobilidade”, resaltou o CEO da Mobile World Capital
Barcelona.