Cabanas bótase ás redes para a súa nova campaña turística
mércores, 25 de xaneiro do 2017
- Unha captura extraída da nova imaxe do concello na Rede
Se
un destino turístico quere medrar en canto a número de visitantes
debe apostar por unha boa promoción e a día de hoxe cómpre
lembrarse das oportunidades que neste senso achegan as novas
tecnoloxías. Así o entenderon dende o Concello
coruñés de Cabanas, que arestora está a traballar na
posta en marcha do proxecto: Cabanas, a Fraga Feita Mar, un
programa de promoción turística pensado para mellorar os
rexistros de visitantes e o que iso supón para o sector hostaleiro e
o comercio local. Basearase, en boa medida, “nas posibilidades que
fornecen as novas tecnoloxías”.
As
novidades que traerá este proxecto ao Concello serán: a estrea de
nova imaxe institucional (presentada
este martes e coa vista posta nos novos soportes), un inventario
da Rede Turística, a creación dun arquivo fotográfico de recursos,
elaboración de materiais audiovisuais para promocionarse, folletos
turísticos divulgativos, ferramentas web e espazos en redes sociais
(Facebook, Twitter, Google+, Linkedin, Pinterest, Instagram…) de
cara a acadar un mellor posicionamento en liña do destino, amais de
organizar xornadas de formación e divulgación, entre outras
iniciativas.
Para
acadar tal fin Cabanas contará coa axuda
económica do GALP Golfo Ártabro Norte (Grupo
de Acción Local do sector Pesqueiro) que
confirmou o seu apoio ao
proxecto cunha achega de arredor de 40.000 euros.
Segundo fixo saber o alcalde, trátase
dunha “ambiciosa iniciativa dirixida a atraer a atención do
potencial visitante poñendo en valor os recursos turísticos
principais de Cabanas e centrándose especialmente nas posibilidades
que brindan as novas tecnoloxías da información”.