Chega ao mercado o primeiro smartphone con lector de pegadas en pantalla

xoves, 25 de xaneiro do 2018 Marcus Fernández

Levamos meses escoitando falar dos sensores de pegadas dixitais detrás da propia pantalla do smartphone, e finalmente o primeiro produto deste tipo chega ao mercado, pois xa pode mercarse o Vivo X20 Plus UD en China a un prezo de 3598 iuans (458 euros), o que deixa claro que estamos ante un dispositivo que busca competir cos grandes smartphones doutros fabricantes.
Este interesante teléfono funciona cun procesador Qualcomm Snapdragon 660, 4 GB de RAM e 128 GB de almacenamento interno (ampliable mediante tarxetas microSD), a súa batería ten unha capacidade de 3.905 mAh, na súa parte traseira presume de dobre cámara de 12 Mpíxeles, a cámara frontal confórmase cun sensor de 5 Mpíxeles, pero o punto forte deste smartphone sería a súa pantalla de 6,43 polgadas cunha resolución de 2.160 x 1.080 píxeles tras a que se agocha un lector de pegadas dixitais que serve para desbloquear o terminal, aínda que tamén conta con software de recoñecemento facial para facer o mesmo.
Non parece que vaiamos ver este produto nos mercados internacionais, pero a tecnoloxía de lectura de pegadas dixitais si poderán empregala outros fabricantes, aínda que neste modelo detectaron que o sensor podería ter algún pero: a detección de pegadas non parece levarse ben con protectores de pantalla.

O lector de pegadas está situado na parte inferior da pantalla, aproveitando que os usuarios están afeitos a tal posición

PUBLICIDADE