Colle pulo a plataforma que centralizará o acceso a todos os nosos servizos de transporte público
martes, 16 de agosto do 2022
O
Portal de Contratos Públicos de Galicia publicou este mes de agosto
a licitación do expediente para o subministro, deseño,
desenvolvemento, implantación, soporte, mantemento e operación da
Plataforma Galega de Mobilidade 4.0, así como o da oficina técnica
para a súa supervisión e dirección.
O
contrato, licitado pola Axencia para a Modernización Tecnolóxica de
Galicia (AMTEGA) no marco do Plan e-Mobility, terá unha duración de
tres anos e un orzamento de 5,7 millóns de euros, e poderá ser
prorrogado por un período similar, polo que o valor estimado é de
algo máis de 9,4 millóns de euros.
O
prazo para a presentación das ofertas por parte das empresas
interesadas finalizará o 14 de setembro.
Segundo
informou AMTEGA, a Plataforma de Mobilidade 4.0 ten como obxectivo
“potenciar o transporte público” e “facilitar o acceso da
cidadanía á información en tempo real en toda a comunidade, así
como ofrecer métodos de reserva ou pago alternativos ao pago en
efectivo”. A plataforma disporá dun planificador multi-modal que
integrará toda a oferta de transporte público e estará aberta á
dar acubillo a doutros servizos, como o transporte urbano, ou o 065
de apoio á mobilidade a persoas con discapacidade ou dependentes.
Amais,
disporá dunha web e dunha aplicación para dispositivos móbiles que
permitirá a planificación de itinerarios, o acceso á información
en tempo real e a xestión de reservas, pagos e bonificacións. A
iniciativa posibilitará tamén introducir os pagos baseados en conta
(Account Base Ticketing - ABT) que, segundo engadiu AMTEGA,
“supón un cambio do modelo actual pague e viaxe a un modelo
viaxe e xa pagará”. Tanto as reservas e pagos como o acceso
ao transporte poderán facerse co teléfono móbil, cunha tarxeta
bancaria ou coa nova Tarxeta de Mobilidade de Galicia. O contrato
contempla a expedición de 120.000 tarxetas adaptadas ao novo
servizo.
A
plataforma, que estará integrada co sistema de Axuda á explotación
da mobilidade de Galicia (SAEGAL), está enmarcada no Plan de
Transporte Público de Galicia e no eixo 5 da Estratexia Galicia
Dixital 2030, Conectividade dixital do territorio e o seu
programa 14: Transporte e Mobilidade Dixital e Sustentábel.