Coñécense as especificacións dos novos Moto G5 e Moto G5 Plus

mércores, 15 de febreiro do 2017 Marcus Fernández

Nas últimas semanas había rumores sobre que Lenovo estaba a preparar unha nova serie de smartphones Moto G, e sen que tivésemos que agardar ao Mobile World Congress de Barcelona, veñen de filtrase completamente as súas especificacións e incluso fotografías dos mesmos, de xeito que xa non son ningún misterio.
Estes novos teléfonos con acabado en aluminio de calidade parten do Moto G5, o terminal máis básico, que contaría cunha pantalla Full HD de 5 polgadas, procesador Qualcomm Snapdragon 430 de 8 núcleos, 2 GB de RAM, 32 GB de almacenamento interno (ampliable mediante tarxetas microSD), cámaras de 13 e 5 Mpíxeles, dobre SIM, lector de pegadas dixitais, batería de 2.800 mAh e sistema operativo Android 7.0.
Máis completo sería o Moto G5 Plus, con pantalla Full HD de 5,2 polgadas, procesador Qualcomm Snapdragon 625 de 8 núcleos, 2 GB de RAM, 64 GB de almacenamento interno (ampliable mediante microSD), cámara traseira de 12 Mpíxeles con enfoque automático dual, dobre SIM, NFC, lector de pegadas dixitais, batería de 3.000 mAh e sistema operativo Android 7.0.
Temos así un par de teléfonos con prestacións bastante básicas, pero máis que suficientes para a meirande parte dos usuarios, que probablemente se acheguen aos mesmos polo seu previsible prezo axustado, que esperamos coñecer en breve.

PUBLICIDADE