Décathlon venderá o seu propio smartphone

Esta semana a cadea de tendas Décathlon porá á venda un smartphone deportivo de seu, o Quechua Phone, que proponse como un dispositivo axeitado para a práctica deportiva ao contar con certificación IP54 (resistente á auga) e unha batería de grande capacidade (3.500 mAh) para non ter que andar pendente de cargadores fóra do fogar (a súa autonomía sería dunhas 22 horas en conversa).
O novo smartphone fabricado por ARCHOS contará cun procesador Qualcomm de catro núcleos a 1,2 GHz, 1 Gb de RAM, 4 Gb de almacenamento interno (ampliable mediante microSD), pantalla de 5 polgadas, cámara de 5 Mpíxeles e Android 4.1 e un prezo de 230 euros. É de agardar que este produto chegue tamén a España de ter unha boa aceptación no país veciño.