En marcha dende Ourense dous equipos da Garda Civil especializados na ciberdelincuencia
mércores, 19 de xaneiro do 2022
O
subdelegado
do Goberno en Ourense, Emilio González, presentou os novos Equipos @
da Garda Civil na provincia de Ourense, especializados na loita
contra a ciberdelincuencia. Así o fixo durante unha visita (este
mércores 19 de xaneiro) á Comandancia da Garda Civil en Ourense, na
que estivo acompañado polo tenente coronel xefe accidental,
Indalecio Linares; polo comandante terceiro xefe, José Benito
Fernández; e polo capitán de Policía Xudicial, Jaime González.
O
subdelegado do Goberno explicou que os Equipos @ están enmarcados
dentro do Plan Estratéxico contra a Cibercriminalidade do Ministerio
do Interior, creado para “previr e perseguir este tipo de
delincuencia, garantindo así a seguridade e a protección dos
dereitos e liberdades dos usuarios na contorna online”.
Emilio
González sinalou que na provincia operan dous destes equipos na
Comandancia de Ourense, o Equipo @Ourense e o Equipo @Santamariña,
que contan con sete efectivos especializados. Forman parte dos 84
equipos postos en marcha en toda España e que integran un total de
304 axentes da Garda Civil.
Trátase,
dixo, de “equipos funcionais encargados de reforzar a resposta ante
a delincuencia online, poñendo o foco nas estafas na Rede”.
Así mesmo, engadiu, “constitúen o primeiro nivel de resposta
específica á ciberdelincuencia, apoiando ás unidades territoriais
que se atopan orientadas á cidadanía, realizando un primeiro
tratamento deste tipo de delitos, apoiando á Policía Xudicial
específica mediante a análise dos ciberdelitos e potenciando a
interlocución de calidade coas vítimas”.
Emilio
González lembrou que durante os últimos cinco anos, e máis aínda
dende a chegada da pandemia, este tipo de delitos experimentaron un
importante incremento, especialmente en paralelo ao medre da
actividade relacionada co comercio electrónico. Así, subliñou que
durante o ano 2021 a ciberdelincuencia aumentou na provincia de
Ourense no ámbito da Garda Civil un 41,4%, xa que se rexistraron 761
infraccións penais telemáticas, mentres que no ano 2020 foron 538.