Gigaset presenta Dune, un teléfono directamente inspirado na natureza
mércores, 6 de agosto do 2014
A marca xermana Gigaset
presentou estes días un interesante aparello “inspirado na
natureza”. Trátase
de Dune, un novo teléfono fixo que semella que non, non ten nada
que ver co libro de Frank Herbert nin co filme de David Lynch do
mesmo nome, pero que está claro que si que se inspira nos elementos
paisaxísticos e naturais que dominaban ambas obras. De aí o seu
nome, duna. Segundo Gigaset, trátase dun trebello “para
consumidores esixentes”, un terminal que aproveita os novos achados
no eido da biónica para achegar “unha ergonomía e unha beleza sen
precedentes”. Preséntase con acabado branco perla e certos
detalles de luxo, como a tecla de navegación en cor cobre.
O de “beleza natural”
e “aproveitamento dos avances da biónica” vén a conto porque o
aparello en cuestión inspírase en certos fenómenos naturais para
adaptalos á súa feitura e tecnoloxías. Segundo explica Maik
Brockmann, CSO de Gigaset, “todos utilizamos numerosas
características biónicas na nosa vida diaria”, e isto ten a súa
orixe na idea de Leonardo da Vinci de aplicar como voa un paxaro ás
máquinas voadoras e conclúe co peche de velcro inspirado en certas
flores e plantas. A arela de Gigaset co deseño de Dune era aplicar
“esa capacidade para perfeccionar de continuo estruturas a través
de procesos evolutivos”. Isto percíbese en elementos como a propia
feitura do aparello, “resultado de formas ergonómicas únicas e
cun auricular cóncavo que encaixa á perfección e que garante a
mellor acústica”.
O frontal de Dune está
formado por unha pantalla 1.8 TFT a cor de 38x32 mm e 65.000 cores,
así como un teclado plano e iluminado. Dune ofrece alta calidade de
son e mans libres HSP (High Sound Performance). O volume do
ton de chamada pódese axustar en cinco niveles e dispón dun jack
de 2,5 mm para a conexión dun auricular (mono). Asemade, conta cunha
axenda de contactos para 200 entradas con tres números cada unha,
pantalla configurábel, funcións de babyphone, alarma
integrada, calendario e recordatorio de aniversarios. O aparello
permite 320 horas en modo de espera e un tempo de conversación de 14
horas. O modelo Dune CL540a conta con contestador automático
integrado que é quen de almacenar até 30 minutos de mensaxes. O
prezo do teléfono DUNE de Gigaset é 79,95 euros.