Google presenta o seu portátil para Chrome OS

xoves, 9 de decembro do 2010 Marcus Fernández

Levamos bastantes meses agardando polo lanzamento do Chrome OS por parte de Google, coma un sistema operativo orientado a ordenadores ultraportátiles (que segundo múltiples voces chegará bastante tarde, por estar este tipo de equipos en decadencia tras a emerxencia dos tablets) e para ir abrindo boca presentan o primeiro equipo que soportará oficialmente esta plataforma, o Google Cr-48, un equipo que distribuirase nos EE.UU. nos vindeiros meses dentro dun programa piloto de Google (cun total de 60.000 unidades) que conta cun procesador Intel Atom, pantalla de 12,1 polgadas, Wi-Fi N, 3G, webcam, almacenamento flash, 1 porto USB 3.0, touchpad multi-táctil de grande tamaño, teclado específico para Chrome OS (dando a entender que non queren que este tipo de equipos teña arranque dual con Windows), saída VGA, batería cunha autonomía para unhas 8 horas e un peso duns 1,7 quilos, ou sexa, algo máis próximo a un portátil básico que a un ultraportátil.
O equipo, aínda que serve simplemente para introducirse a Chrome OS, non parece que vaia converterse nun referente coma os móbiles promovidos por Google, ou iso parece se atendemos ás primeiras impresións publicadas sobre o mesmo, no que quedan patentes as súas eivas (totalmente perdoables ao non ser un produto comercial).

O teclado do Google Cr-48 ten un deseño orientado a Chrome OS

PUBLICIDADE