Halo: Spartan Assault actualízase con interesantes novidades

xoves, 29 de agosto do 2013 Marcus Fernández

O xogo Halo: Spartan Assault vén de actualizarse tanto na súa versión para Windows Phone 8 como en Windows 8, conseguindo que esta revolucionaria entrega da franquía do Xefe Mestre sume moitos puntos ao achegarse a máis usuarios e gozar de novas posibilidades.
Ambas entregas de Halo: Spartan Assault reciben 5 novas misións baixo o título de Operation Hydra e novos logros (50 puntos), mentres que a versión para Windows Phone 8 optimízase para poder funcionar en móbiles con só 512 Mb de RAM (polo que os usuarios de móbiles básicos xa poderán instalar este impresionante título) e baixo Windows 8 incorpórase a atractiva posibilidade de poder xogar conectando ao ordenador un mando con cable para Xbox 360, o que agradecerán especialmente os seareiros desta grande saga exclusiva de plataformas de Microsoft e que, polo tanto, xogaron a case todas as súas entregas co mencionado mando.
O xogo está á venda por 6,49 euros para Windows Phone 8 e por 5,99 euros para Windows 8/RT.

PUBLICIDADE