Instagramers turísticos británicos toman a nosa terra
mércores, 1 de xuño do 2016
Este xoves
recalará na nosa terra un senlleiro grupo de usuarios británicos
da rede social Instagram, comunidade centrada en acubillar xente
arredor do partillado de fotos e vídeos, tanto no seo de Instagram
como dende esta rede social cara as restantes (Facebook, Tumblr,
Flickr, Twitter, etc). O devandito colectivo ten máis cousas en
común alén da súa pertenza a Instagram: son internautas viaxeiros
e expertos en turismo, referentes na Rede no que se refire a
recomendacións de que sitios ver, onde durmir e onde comer. A súa
estadía, dirixida a xuntalos á “causa común” de promocionar no
mundo a nosa terra, está organizada por Turismo de Galicia.
Estes instagramers
especializados, que suman entre todos eles máis de 133.000 seareiros
na rede, chegarán á Coruña e ficarán en terras galegas até o
vindeiro domingo, 5 de xuño, logo de visitar distintos lugares e
destinos turísticos da nosa xeografía. Segundo informa Turismo de
Galicia, ao longo da súa estadía tamén terán a oportunidade de
coñecer a gastronomía e a enoloxía de Galicia, así como o Camiño
de Santiago.
Segundo informa o dito
Departamento da Xunta para facernos unha idea do potencial da visita,
o mercado británico (con preto de 9.000 viaxeiros aloxados e 21.200
pernoitas hoteleiras) sitúase en quinto lugar na clasificación dos
principais mercados estranxeiros, representando no primeiro
cuadrimestre do ano o 7,4% do total internacional. “Nestes catro
meses, o turismo británico rexistrou un comportamento positivo
superando nun 14% a cifra de viaxeiros aloxados e nun 38% o volume de
pernoitas do mesmo período do ano anterior”, engade Turismo de
Galicia.