Internet dálle folgos ao incremento do consumo cultural galego
mércores, 21 de decembro do 2016
O
Observatorio
da Cultura do CCG vén de publicar un informe que sitúa a nosa terra
como a Comunidade con meirande medre en consumo cultural do Estado,
con 635 millóns de euros en 2015 e un 15,9% de suba con respecto ao
exercicio previo. Estas cifras positivas, que confirman unha
recuperación do sector que xa tardaba (a tendencia é por primeira
vez declaradamente alcista dende 2008), débense en parte a un
meirande investimento familiar en publicacións periódicas, en
Internet e en servizos culturais e espectáculos.
Segundo
fai saber o Observatorio, as devanditas
cifras son “datos moi relevantes xa que poñen de manifesto unha
recuperación do consumo cultural por primeira vez desde os inicios
da crise desde 2008, cando en Galicia se gastaba 827,2 millóns de
euros en consumo cultural”. No
informe sinálase que
os galegos gastaron en cultura uns 78,1 euros máis que o ano
anterior, sendo a comunidade na que máis se incrementou o consumo de
cultura. O consumo medio por fogar é nestes momentos de 587,7 euros.
Como
dixemos, o incremento
de gasto cultural de Galicia concentrouse en
boa medida en
publicacións periódicas, equipos
audiovisuais de
tratamento da
información e Internet e
espectáculos e outros servizos de bens culturais non contemplados
nos anteriores. Entre as potenciais causas da
tendencia á suba do consumo deste tipo de produtos,
o Observatorio da Cultura Galega do CCG sinala o descenso dos prezos
dalgúns bens e servizos culturais, sobre todo equipos informáticos
ou audiovisuais. Tamén
contribuíu o medre da confianza dos consumidores,
que pasou dun 40% hai catro anos ao 70% en 2015.