Kobo presenta 2 novos modelos de e-reader

O vindeiro 19 de outubro renovaranse os lectores de libros electrónicos da marca Kobo cun par de modelos moi interesantes, principalmente para consumidores que buscan dispositivos que non estean ligados a Amazon como acontece cos Kindle.
O Kobo Libra 2 sería un lector de libros electrónicos con pantalla de 7 polgadas de tinta electrónica cunha definición de 300 puntos por polgada, iluminación ComfortLight PRO (con brillo axustable), deseño ergonómico e resistente á auga, 32 GB de capacidade de almacenamento, conectividade Wi-Fi, compatibilidade coa maioría de formatos de libros electrónicos e incluso a posibilidade de escoitar audiolibros a través de Bluetooth. Un completo dispositivo que poderá adquirirse en cor negra ou branca a un prezo de 189,99 euros.

Vídeo promocional do Kobo Libra 2

Máis rechamante resulta o Kobo Sage, lector de libros electrónicos cun deseño moi semellante ao anterior, pero cun tamaño superior, xa que a súa pantalla é de 8 polgadas e, como grande novidade, inclúe compatibilidade con Kobo Stylus (á venda por separado a un prezo de 39,99 euros), ou sexa, que conta cun lapis para poder realizar anotacións en libros electrónicos e documentos PDF. Estará dispoñible en cor negra por 289,99 euros.

Vídeo promocional do Kobo Sage