Lanzados dous robots para nenos que xuntan aprendizaxe e diversión: Dash e Dot

venres, 6 de novembro do 2015 Redacción

A firma española Ildesoft está a presentar estes días dous trebellos para os máis pequenos da casa que a empresa cualifica, de cara as festas vindeiras do Nadal, como “o agasallo perfecto” para a dita festividade que se achega. Trátase dos robots educativos Dash & Dot, dous aparellos que a xuízo Ildesoft resolve unha dúbida clásica de todas as nais e pais (o dilema“agasallo divertido ou educativo?”) achegando un par de produtos que abranguen o didáctico e máis o puramente lúdico. Atópanse dispoñíbeis xa cun prezo entre 179 e 299 euros e diríxense, sobre todo, a nenas e nenos de entre 5 e 12 anos. Coa axuda deste aparellos, sinala a empresa, os cativos “poderán desenvolver o seu lado máis creativo e converterse nos propios deseñadores dos seus xogos”.
Así, poderán facer cousas como programar e definir, “de maneira sinxela e desde a súa tableta ou dispositivo intelixente”, cada un dos movementos e accións dos robots, desenvolvendo capacidades de programación que, segundo lembra a empresa distribuidora, “seranlles de utilidade o día de mañá”. Nun plano máis específico os robots permiten desenvolver actividades cotiás como organizar unha merenda, construír murallas de defensa para un xogo de estratexia ou facilitar avisos para advertir aos usuarios de cando se achega a súa mascota. Os aparellos foron desenvolvidos pola compañía Wonder Workshop, con sede en California (USA) e integrada por profesionais procedentes do mundo da psicoloxía infantil, creadores, artistas, profesores e creativos.

PUBLICIDADE