O CNTG acollerá unha demostración do framework Grails

O vindeiro xoves, 29 de abril, o Centro de Novas Tecnoloxías de Galicia da Consellaría de Traballo e Benestar, vai dar acollida, en horario de 9:30 a 13:30 horas, a un seminario de demostración do framework Grails.
Grails é un framework open source para o desenvolvemento de aplicacións web baseado en Groovy e Java que segue os principios “Don’’t Repeat Your Self” (Non te repitas) e “Convention over Configuration” (Convención sobre configuración), que permite engadirlle á caixa de ferramentas a capacidade de crear prototipos ou probas de concepto en tempo récord e permitindo, dentro do mesmo framework, a creación da base de datos, as pantallas de altas, baixas, modificacións e borrado de maneira automática.
Durante o seminario, que vai dirixido a desenvolvedores, programadores e xefes de proxecto con coñecementos de programación, realizarase unha demostración das capacidades de Grails creando unha aplicación web dende cero.
O relator da xornada será D. Luis Gervaso, profesional especializado en frameworks de código aberto orientados á creación de aplicacións baseadas en estándares web, e coaborador, como docente, do CNTG na impartición de cursos de programación en Java e Desenvolvemento de aplicacións con Spring, Hibernate & JSF.
As persoas interesadas en acudir a este relatorio, que será de balde para todo o mundo, deberán inscribirse no mesmo a través da web do CNTG antes do vindeiro 28 de abril.