O Club Financeiro Atlántico fará irmandade con clubs de todo o mundo a través dun foro dixital
venres, 5 de maio do 2017
O Club
Financeiro Atlántico vai organizar o vindeiro 25 de maio un
encontro de longo alcance, xeográfico, tecnolóxico e informativo.
Trátase da primeira edición do Foro
Dixital Internacional de Clubs, unha xuntanza en liña dirixida a
entidades estatais e internacionais para, en palabras do colectivo
financeiro con base na Coruña, “crear un novo espazo de networking
virtual e proxectar ao mundo a importancia da transformación
dixital, empregando a telepresencia e a rede social corporativa como
sistema de comunicacións dos clubs participantes en todo o mundo”.
A misión é fornecer ás entidades e aos seus integrantes de
“servizos de primeiro nivel”, facilitándolles o intercambio de
valor e máis un lugar ideal de encontro para os seus negocios e
relacións sociais e culturais. Participarán, entre outros, Javier
García Tobío, director do Centro de Supercomputación de Galicia
(CESGA), Adolfo Fernández, responsábel de Desenvolvemento de
Negocio de Google para España e Portugal, e Jesús Echarri Maceiras,
director executivo da firma galega Improving Metrics.
Como dixemos, o Foro Dixital Internacional de
Clubs (Foro Transformación Dixital: Os Desafíos Tecnolóxicos do
século XXI), celebrarase o vindeiro 25 de Maio. A intención do
Club Financeiro Atlántico é contar coa participación por
videoconferencia de todas as entidades “irmás” coas que mantén
relación de correspondencia, máis “con outros moitos clubs aos
que convidaremos a conectarse”, participando nos relatorios e
realizando preguntas a través dunha conexión permanente con eles.
Con independencia da devandita liña de
actividade, desenvolverase un foro presencial no salón social do
club galego, dende o que se vai establecer conexión virtual
transfronteiriza. Para isto disporase de varias pantallas nas que
irán entrando os representantes dos distintos clubs a través de
videoconferencia. “Este sistema de telepresencia”, informan os
organizadores, tamén permitirá aos conferenciantes conectarse desde
os seus lugares de orixe e compartir os seus relatorios”.
Entre os relatores confirmados atópanse Javier
García Tobio, director do CESGA, Pedro Martínez de la Rosa,
ex-piloto de Fórmula 1 e comentarista de Movistar, Silvia Leal,
experta en innovación e transformación dixital e directora de
Programas de Tecnoloxía do IE, Adolfo Fernández, responsábel de
Desenvolvemento de Negocio de Google para España e Portugal,
Graciela Garrido, subdirectora xeral de Econet España, Venancio
Salcines, socio fundador da Escola de Finanzas, Jesús Echarri,
director executivo de Improving Metrics, Emilio del Prado, fundador e
presidente de Data Economy e socio director de Epunto, Miguel Silva,
presidente fundador do Spanish Business Council nos Emiratos Árabes
Unidos, e Judit Cabana, responsábel da Axencia de Marketing en
BySidecar.
Logo dos relatorios celebrarase o xantar
institucional do foro.