O Goberno destina 52 millóns a Galicia para levar banda larga a máis de 137.000 fogares e empresas
mércores, 30 de novembro do 2022
O
Goberno, a través do Ministerio de Asuntos Económicos e
Transformación Dixital, publicou a resolución definitiva da segunda
convocatoria do Programa Único-Banda
Larga,
que permitirá estender as conexións de moi altas capacidades (polo
menos 100 Mbps) a 137.177 novos fogares e empresas en Galicia, cun investimento de 51,95 millóns de euros.
A
resolución adxudica un investimento total de 244,6 millóns de euros
a 50 proxectos dos 159 presentados, co obxectivo de levar acceso á
conexión en banda larga ultrarrápida a 728.500 fogares e empresas
en toda España. A extensión destas redes forma parte dos investimentos
previstos polo Goberno, no marco do Plan de Recuperación,
Transformación e Resiliencia e a axenda España Dixital 2026, e está
financiada con fondos Next Generation EU.
Preto
da metade dos proxectos concéntranse en Galicia, Castela e León e
Andalucía. A listaxe definitiva de proxectos aprobados así como os
municipios onde se desenvolverán poden consultarse na web do
Ministerio de Asuntos Económicos e Transformación Dixital, a través
da ligazón
específica habiliada.
A
meirande parte dos territorios afectados atópanse en zonas brancas:
sen cobertura de redes de polo menos 30 Mbps, nin plans para a súa
dotación nos vindeiros tres anos; e o resto, en zonas grises: sen
cobertura de banda larga ultrarrápida ou de previsións para a súa
dotación nos vindeiros 3 anos por parte dun só operador.
Segundo informan fontes do Goberno, "na
actualidade, España é líder en conectividade en Europa, ocupando a
terceira posición, segundo o derradeiro Índice de Economía e
Sociedade Dixitais (DESI), que elabora a Comisión Europea".
O
plan estatal
diríxese a acadar unha taxa de cobertura de moi altas capacidades
para o 100% da poboación en 2025. Dende 2018, o programa inverteu
máis de 1.500 millóns de euros a través dos programas, e a
inversión público-privada total en 2022 será de 388,2 millóns de
euros.