O Huawei P9 fai uso dunha dobre cámara traseira de Leica para destacar na fotografía móbil

Hoxe Huawei celebrou unha grande presentación en Londres para dar conta dos seus novos smartphones, que pretende converterse en referentes da fotografía móbil grazas á colaboración con Leica. Trátase dos Huawei P9 e P9 Plus que iniciarán o seu lanzamento comercial o 16 de abril en 29 países entre os que figura España.
Richard Yu, o director xeral do Huawei Consumer Business Group, expresou o seu entusiasmo por “achegar aos usuarios do P9 a mellor experienica de fotografía nun smartphone mediante o aproveitamento das capacidades sen rival de Leica, líder mundial no mundo da imaxe durante máis de 100 anos”, e para deixar clara a súa aposta, Huawei vai tirar proveito de estrelas cinematográficas como Henry Cavill e Scarlett Johansson, quen farán de embaixadores dos Huawei P9 e protagonizarán o seu anuncio de televisión do que amosaron un adianto para o que contaron con Cavill no escenario.
Para poder destacar coa súa cámara os P9 optan por un sistema de cámara dual, de xeito que unha cámara RGB especialízase en captar a cor, mentres que a outra rexistra o detalle das imaxes, conseguindo así instantáneas cun nivel de detalles, profundidade e cor que incluso conseguen resultados de calidade en condicións de baixa luz. Un dos detalles máis curiosos desta configuración é que o móbil pode funcionar como unha cámara en branco e negro real.
Para conseguir unhas imaxes nítidas, as cámaras do P9 combinan tres tecnoloxías no seu enfoque (láser, cálculo da profundade e contraste) e elixe a que considera que dá o mellor resultado. Tamén contan con axustes da apertura da cámara para poder crear efecto bokeh e outros efectos de profundidade de campo.
A nivel de acabado Huawei tamén coida estes novos teléfonos, para que quede claro que estamos ante produtos premium, o que pode verse dende a súa carcasa de aluminio de clase aeroespacial e o cristal 2.5D, até os acabados en cor bruma dourada facendo uso de técnicas que inclúe o cepillado de liñas e o pulido de metal con elevada precisión para crear unha superficie de metal translúcida. Adicionalmente tamén estará dispoñible unha versión do P9 en cor branco cerámico que emula a pintura dos coches de alta gama, que reacciona de xeito impresionante ante o cambio das condicións ambientais.
O Huawei P9 vén a ser un smartphone con pantalla Full HD de 5,2 polgadas, procesador Kirin 955 de oito núcleos, 3/4 GB de RAM, 32/64 GB de almacenamento interno, cámara traseira de 12 Mpíxeles con dobre obxectivo, cámara frontal de 8 Mpíxeles (con apertura F/1.8), lector de pegadas dixitais e batería de 3.000 mAh (dabondo para reproducir 12 horas de vídeo en HD ou navegar en 4G durante 8 horas), que funciona con Android 6.0 coa capa de personalización EMUI 4.1. O modelo con 3 GB de RM e 32 GB de almacenamento interno venderase por 599 euros, mentres que con 4 GB de RAM e 64 GB de almacenamento interno custará 649 euros.
Pola súa banda o Huawei P9 Plus diferénciase por incorporar unha pantalla Full HD de 5,5 polgadas con Press Touch, batería de 3.400 mAh (que presume de conseguir unha autonomía un 30% maior que un iPhone 6s Plus) e un sistema de carga rápida que permite autonomía para falar por teléfono até 6 horas con só 10 minutos de carga. Este terminal chegará ao mercado a un prezo de 749 euros, estando equipado con 4 GB de RAM e 64 GB de almacenamento interno.