O ICD Vega comercializarase a través de operadoras de telefonía móbil

mércores, 13 de xaneiro do 2010 Marcus Fernández

En novembro falamos de que ICD estaba a preparar un equipo tipo tablet chamado Vega que funcionaría cun procesador nVIDIA Tegra e co sistema operativo Android, e finalmente parece ser que o produto chegará a distintos mercados da man de operadoras de telefonía móbil.
Así, no Reino Unido é T-Mobile a operadora que venderá un ICD Vega de 15 polgadas con Android 2.0 e un procesador nVIDIA Tegra que permitirá a reprodución de vídeo a 720p, mentres que nos EE.UU. Verizon opta por un ICD Vega de 7 polgadas cun procesador nVIDIA Tegra 2 capaz de reproducir vídeo a 1.080p e que destacaría por gozar de conectividade LTE (a tamén chamada 4G).
Estes produtos parecen querer anticiparse ao tablet que podería presentar Apple a finais de mes, nunha competición que lembra á que hai pouco máis dun ano vivimos cos ordenadores ultraportátiles de baixo custo.

PUBLICIDADE