O Lenovo Z51 integrará cámara 3D compatible con Windows Hello

xoves, 28 de maio do 2015 Marcus Fernández

Lenovo está a presentar numerosos produtos estes días, entre os que temos que destacar o ordenador portátil Lenovo Z51, que coa súa pantalla Full HD de 15 polgadas, procesador até Intel Core i7 de quinta xeración, opción de contar cunha gráfica AMD, até 1 TB de almacenamento, Wi-Fi AC e son envolvente Dolby podería parecer un equipo bastante normal se non fose porque será posible adquirilo cunha cámara Intel RealSense 3D integrada, ou sexa, que contaría con tecnoloxía de webcam Full HD con sensor de profundidade.
Aínda que inicialmente a tecnoloxías RealSense 3D estaba orientada para escanear obxectos en 3D, poder xogar a algúns títulos, poder controlar o equipo con xestos ou poder realizar videoconferencias mudando o fondo, a grande vantaxe que achegaría este hardware estaría no feito de que sería o primeiro compatible con Windows Hello, ou sexa, que Windows 10 podería empregar a cámara para recoñecer ao usuario a cada momento, evitando así que teña que introducir constantemente contrasinais mentres emprega o seu equipo informático.
O Lenovo Z51 sairá á venda en xuño a un prezo que parte dos 499 dólares nos EE.UU., aínda que o modelo de 599 dólares sería posiblemente o máis atractivo, xa que integraría a mencionada cámara 3D, procesador Intel Core i5 e 8 GB de RAM, polo que estariamos ante un equipo bastante potente e cun salientable compoñente innovador.

PUBLICIDADE