O Transformer Prime farase agardar ata o 12 de xaneiro
venres, 16 de decembro do 2011
Este Nadal parece que finalmente non será o que supoña o duelo
entre o iPad e os tablets con Android, posto que os dispositivos deste tipo con
Android 4.0 e procesadores de nova xeración non chegarán a tempo ás tendas,
polo que Apple terá a batalla ganada antes de comezar.
Concretamente sabemos agora que o tablet máis agardado, o Asus Eee Pad
Transformer Prime, que será o primeiro en incorporar procesador de 4 núcleos
nVIDIA Tegra 3 e en breve contará cunha actualización do seu sistema operativo
a Android 4.0, non
chegará ás tendas europeas ata o 12 de xaneiro, se atendemos á data
que figura en ebuyer.com, establecemento en liña no que publican que o
prezo do tablet será de 499,98 libras esterlinas (595,93 euros).
De todos os xeitos, quen desexe un dispositivo semellante, esta mesma fin de
semana nalgún
establecemento comercial en Galicia van ofertar o Eee Pad Transformer anterior
a 299 euros no seu modelo básico (e a 449 euros o modelo con 32 Gb de
almacenamento interno e teclado).