O ZTE Grand S II podería ser o primeiro smartphone con 4 Gb de RAM

venres, 28 de marzo do 2014 Marcus Fernández

O blog tecnolóxico Engadget está a publicar imaxes do acabado do futuro terminal ZTE Grand S II, un smartphone moi prometedor, que se atendemos á ficha que publican en Tenaa, sería o primeiro móbil con Android en integrar 4 Gb de RAM, de xeito que neste ocasión non sería un fabricante como Sony, HTC ou Samsung o que se encargaría de estrear un novo tope en especificacións. Ata o momento esperábase que este móbil chegase ao mercado con 2 Gb de RAM, pero de incorporar 4 Gb resultaría especialmente rechamante por ser o máximo que podería xestionar un sistema de 32 bits, de xeito que chegaría a un teito un tanto artificial (aínda que hai móbiles con 3 Gb de RAM, polo momento a meirande parte dos terminais non teñen problemas para funcionar cun bo rendemento con 1-2 Gb de memoria) que para superalo forzaría ao salto aos 64 bits, para o que xa están preparados varios fabricantes (impulsados pola estrea dos 64 bits no iPhone 5S).
Espérase que o ZTE Grand S II funcione cun procesador Qualcomm Snapdragon 800 ou 801, Android 4.3, pantalla Full HD de 5,5 polgadas, 16 Gb de almacenamento interno (ampliable mediante tarxetas de memoria de ata 32 Gb), cámaras de 13 e 2 Mpíxeles e batería de 3.000 mAh.

O ZTE Grand S II chegará ao mercado cunha carcasa traseira metálica

PUBLICIDADE