O espertador de Nintendo poderase adquirir libremente a partir de marzo

luns, 13 de xaneiro do 2025 Marcus Fernández

Nos últimos meses o reloxo espertador interactivo de Nintendo, Alarmo, foi un obxecto de deseño para moitos seareiros da compañía de Mario e Zelda, que só estaba dispoñible para a súa compra por parte de subscritores do servizo Nintento Switch Online, a un prezo de 99,99 euros, aínda que en poucas semanas estará dispoñible para o público xeral.
Nintendo vén de anunciar que, aínda que tiñan previsto que a restrición da venda de Alarmo a subscritores de Nintendo Switch Online se mantería até mediados de mes, finalmente tiveron que adiar a apertura das vendas a través de máis distribuidores a primeiros de marzo.
Non parece que esteamos ante un produto de vendas masivas, pero probablemente as unidades fabricadas eran moi limitadas, en boa medida porque non estamos ante un produto semellante aos que habitualmente venda Nintendo, o que explicaría a súa prudencia á hora de comercializalo, premiando aos seus usuarios máis comprometidos coa posibilidade de adquirir o espertador de xeito preferente.

Vídeo promocional do espertador interactivo de Nintendo