O novo móbil encartable de Huawei segue os pasos de Samsung

luns, 22 de febreiro do 2021 Marcus Fernández

Dende Huawei quixeron facer fronte aos smartphones con pantalla encartable de Samsung dun xeito demasiado ousado, e así tivemos no mercado de xeito testemuñal dispositivos como o Huawei Mate Xs, que non só atrevíase a ter un prezo de venda bastante superior ao do seu competidor directo, senón que adoptaba certas decisións de deseño que a simple vista parecían un desacerto, como que a pantalla principal quedase exposta na parte exterior do smartphone ao encartalo, o que supón un grande risco para a súa integridade.
O fabricante chinés parece ter tomado boa nota dos erros do pasado, e agora que lanza o Huawei Mate X2 opta por deixar atrás a súa proposta de deseño e directamente copia ao Samsung Galaxy Z Fold2, pero mantendo un prezo moi esaxerado, xa que en China véndese a 17.999 iuans (2.288 euros) cando o móbil de Samsung custa oficialmente 1.699 euros e resulta doado atopalo de oferta a menos de 1.300 euros, facendo que o novo produto de Huawei teña moi complicado atopar un oco no mercado. Aínda que cómpre lembrar que non só o prezo xoga en contra do novo encartable de Huawei, senón tamén o feito de que carece dos servizos de Google preinstalados, o que supón un serio problema para os consumidores de fóra de China.
A nivel de hardware temos un smartphone que presenta unha pantalla OLED de 8 polgadas cando está aberto, e unha pantalla OLED de 6,45 polgadas cando está pechado (ambas cun refresco de 90 Hz), co detalle significativo de que só a pantalla de menor tamaño contaría cunha perforación para albergar cámara frontal (ou sexa, que repetiría o erro de carecer de cámara frontal na pantalla principal, de xeito que non podería aproveitarse a grande pantalla para videoconferencias); funciona cun procesador Kirin 9000 5G, 8 GB de RAM, 256/512 GB de almacenamenot interno; presume de grandes cámaras traseiras (con sensor principal de 50 Mpíxeles, zoom óptico de 3x nun sensor de 12 Mpíxeles, zoom óptico de 10x nun sensor de 8 Mpíxeles e ultra grande angular de 16 Mpíxeles); conta con Wi-Fi 6, BLuetooth 5.2 e NFC; e a súa batería de 4.500 mAh pode cargarse a 55 watts.
Un terminal de alta gama, pero cunha configuración un tanto deficiente para un prezo tan elevado, sendo especialmente rechamante o feito de que coidase tanto as súas cámaras traseiras mentres que o elemento das cámaras frontais quedase tan descompensado (xa que non poder aproveitar a pantalla de 8 polgadas para videoxonferencias é unha eiva moi importante).

PUBLICIDADE