Os fundamentos e as utilidades do testing, ao detalle nun curso de Vitae
martes, 18 de febreiro do 2020
Por
razóns de operatividade, de rapidez e de prazos cada vez máis
curtos, as probas (o testing) no desenvolvemento informático
non teñen toda boa sona que sería de desexar, malia ser unha parte
fundamental do traballo de programación e, por extensión, de
calquera ámbito empresarial e industrial onde se acheguen produtos
ou servizos de certa complexidade. As vantaxes da “fase de probas”
son múltiples e inimaxinábeis, e comparten todas elas o mesmo
alicerce: garantir a máxima calidade para un produto. Porén, fan
falta recursos que fagan máis accesíbeis estas metodoloxías e,
tamén, que lles quiten ferro. Aí entra en xogo a nova edición (a
sexta) do Curso
de Fundamentos en Testing que organiza novamente Vitae Consultores.
A
actividade formativa sobre testing celebrarase na Coruña no
Hotel Attica 21 os días 3 e 4 de marzo. Incluirá novamente 16 horas
de contidos e servirá, nun plano máis detallado, para capacitar aos
asistentes no dominio de recursos que optimicen os seus proxectos,
adestrándoos en metodoloxías útiles para transformar ferramentas
desenvolvidas para sacar un aprobado en ferramentas feitas para obter
un notábel ou mesmo un sobresaliente.
O
curso, un achegamento integral aos coñecementos e ferramentas
precisas para asegurar o factor calidade na creación de programas,
subministra a opción de Certificación en Fundamentos de Testing
polo programa de certificación ISTQB (International Software
Testing Qualifications Board), que é o estándar mundial para
avaliadores de programas informáticos.
Segundo
explican dende a academia Vitae Consultores, a finalidade desta
acción formativa é proporcionar os procedementos e métodos de
meirande relevancia actual para capacitar aos asistentes na xestión,
na planificación, no deseño e na execución de probas de software
coa meirande eficacia. Desta maneira, os profesionais que participen
no obradoiro terán “a oportunidade de entender os conceptos clave
das probas de software, asegurar un alicerce sólido para o medre
profesional na área e comprender as técnicas básicas de validación
de programas”, engade Vitae.
O
curso está dirixido a profesionais da actividade de probas, como
testers, analistas e enxeñeiros de probas, así como responsábeis
de calidade de software. Tamén se encamiña a profesionais que
desexen acadar unha visión avanzada e integral dos procesos de
avaliación, como xefes de proxectos, analistas de negocio, xerentes,
consultores TI e programadores.
A
persoa encargada de impartir todos estes contidos será Aurelio
Gandarillas, enxeñeiro en Informática e enxeñeiro técnico
industrial en Electrónica, con máis de 25 anos de experiencia no
sector das novas tecnoloxías da información e máis dunha ducia de
anos como consultor e formador nos eidos do deseño, a implantación
e a mellora dos procesos de desenvolvemento e calidade do software.