Plants vs. Zombies 2 pode descargarse de balde dende España

A primeiros de xullo nos antípodas PopCap Games estreou na App Store o agardado xogo Plants vs. Zombies 2, como unha proba antes do seu lanzamento global esta mesma semana, polo que xa temos dispoñible esta nova entrega dun dos xogos de estratexia e acción de máis éxito en dispositivos móbiles, que desta volta muda o seu modelo de negocio para converterse en Free-to-Play, o que supón que teremos o xogo de balde, pero o título contará cun sistema de progresión no que debemos consumir moito tempo para avanzar, existindo a posibilidade de atallar realizando pagamentos con cartos reais.
Outro dos grandes cambios desta nova entrega do xogo no que temos que colocar plantas para defendernos do ataque de hordas de mortos viventes é que non teremos a casa do protagonista como único escenario, senón que podemos movernos no tempo e nos espazo, comezando no presente, pero trasladándonos logo ao antigo Exipto, a ao tempo dos piratas en pleno mar Caribe ou ao salvaxe Oeste Americano.
Plants vs. Zombies 2 convértese en todo un referente do seu xénero, tanto por ofrecer un xogo divertido e gracioso (que aínda que teña a zombis como inimigos é apto para maiores de 9 ano) como por saber atopar un equilibrio entre o xogo de pagamento e o xogo Free-to-Play.