PlayStation celebra os seus 30 anos avogando pola nostalxia

O 3 de decembro de 1994 chegou ás tendas nipoas a primeira consola PlayStation, e para celebrar este 30º aniversario a partir de hoxe inician unha das habituais rebaixas na PlayStation Store (que encadearían coas que xa estamos a vivir co gallo do Black Friday) e que tamén chegarían aos produtos de hardware que a marca vende directamente vía web.
Pero aínda que os descontos poidan parecer importantes, está a captar máis atención o nostálxico vídeo co que se celebra o 30º aniversario de PlayStation, así como unha novidade que está a chegar ás propias consolas PlayStation 5, e que permite que a súa interface de menús, de xeito conmemorativo, poida verse como o de vellas consolas da marca, ou sexa, que podemos traer de volta os menús das anteriores xeracións de PlayStation, recuperando tanto a súa estética como os seus sons característicos, o que espertará moitas lembranzas dende o primeiro momento, xa que incluso se recupera a pantalla de carga tradicional das primeiras PlayStation.