Polaroid estrea un tablet para un público infantil

venres, 4 de xaneiro do 2013 Marcus Fernández

Aínda que teñamos asociada a marca Polaroid principalmente a cámaras e películas fotográficas, a compañía que está a celebrar os seus 75 anos de vida diversificou a súa gama de produtos, entre os que agora figura un tablet con pantalla de 7 polgadas pensado para o público infantil que xa está á venda por 149,99 dólares (115,23 euros) e poderá verse en vivo no CES de Las Vegas.
O tablet infantil de Polaroid funciona cun procesador Cortex A8 a 1 GHz, 512 Gb de RAM, 8 Gb de almacenamento interno ampliable mediante tarxeas SD, cámara traseira de 2 Mpíxeles, pantalla de 7 polgadas cunha resolución de 800 x 480 píxeles, Wi-Fi N, batería recargable de 3.500 mAh e sistema operativo Android 4.0 con 35 aplicacións premium precargadas, prestacións que parecen un tanto deficientes para tal prezo, que parece responder á personalización ás que someten a este tipo de equipos para que sexan seguros e agradables para os máis pequenos.
O tablet de Polaroid non só inclúe moitos contidos para nenos, senón que incluso conta cunha tenda de aplicacións exclusiva con numerosas aplicacións (tanto de balde como de pagamento) axeitadas para os cativos; incluíndo tamén a aplicación de libros electrónicos de NOOK (de Barnes&Noble) na que están dispoñibles numerosos contos infantís. O seu navegador web tamén inclúe filtros de control parental, e entre as características do tablet destaca a posibilidade de bloquear a pantalla e os botóns para que os nenos máis pequenos poidan ver vídeos sen interrompelos accidentalmente.

O tablet de Polaroid está optimizado para o seu uso por parte de cativos

PUBLICIDADE