Propoñen o uso de dúas pantallas de papel electrónico como lector de partituras musicais

venres, 17 de xuño do 2016 Marcus Fernández

Terrada Music Score presentou no Xapón un produto chamado GVIDO, que aseguran que sería o primeiro dispositivo de partituras musicais baseado nunha dobre pantalla de papel electrónico, de xeito que os profesionais da música teñen unha práctica ferramenta á hora de interpretar pezas no escenario sen ter que recorrer ás partituras en soporte físico.
O novo dispositivo vén a ser unha dobre pantalla de papel electrónico da propia E Ink cunha diagonal de 13,3 polgadas (cunha resolución de 1.200 x 1.600 píxeles con 16 niveis de gris), que tería un grosor de 5,9 milímetros e un peso duns 650 gramos, de xeito que sería unha solución moi práctica para a lectura de partituras nun formato equivalente ao dos soportes físicos, coa vantaxe de que tamén permiten anotacións empregando lapis de Wacom.
As partituras almacenaríanse en formato PDF, e as anotacións feitas a man ou os marcadores que faga o usuario gardaranse no propio ficheiro, contando o trebello con Wi-Fi N e Bluetooth 4.0 para facilitar a transmisión dos ficheiros. A súa capacidade interna (de 8 GB) tamén poderá ampliarse con tarxetas microSD, de xeito que garántese o almacenamento dun impresionante volume de partituras dispoñibles, o que agradecerán os músicos que interpreten un grande repertorio e non queiran ir cargados con todo un baúl cheo de partituras durante as súas viaxes.
Polo momento este produto está nunha fase de prototipo, e aínda non se anunciou o seu prezo final, que podería ser bastante elevado, xa que as pantallas de tinta electrónica de grande tamaño son extraordinariamente caras (o eReader con pantalla de 13,3 polgadas e stylus de Sony véndese por 799 dólares nos EE.UU.).

Vídeo de presentación do GVIDO

PUBLICIDADE