Rock Band 3 sairá en todo o mundo o 26 de outubro

MTV Games e Harmonix confirmaron que o xogo musical Rock Band 3 fixa o seu lanzamento internacional o vindeiro 26 de outubro nas súas versións Xbox 360, PlayStation 3, Wii e Nintendo DS. Deste xeito din adeus ás demoras no desembarco europeo desta franquía, así como á prioridade da Xbox 360 en recibir os títulos desta saga.
Esta nova entrega da saga musical de Harmonix pretende dar un salgo adiante no xénero, con numerosas novidades entre as que destaca especialmente a incorporación do teclado coma instrumento ou o uso de filtros que corrixan a entoación da voz do usuario en tempo real.
Os usuarios que reserven o xogo poderán optar a distintas ofertas, coma bonos de desconto en futuras compras ou a descarga de balde de temas musicais coma My Own Summer (The Deftones), Blue Monday (New Order) e Burning Down the House (Talking Heads), aínda que polo momento non anunciaron os establecementos españois que terán dispoñibles estas promocións.