Rock Band despídese ao son de American Pie

A saturación de xogos musicais en consolas de videoxogos provocou un colapso do xénero, e como consecuencia, os editores de títulos como Rock Band ou Guitar Hero tiraron a toalla, aínda que continuaron a dar soporte aos seus títulos publicando contidos descargables para os seus xogos, o que non podía continuar eternamente, de xeito que esta mesma semana a franquía de Rock Band (composta polos xogos Rock Band, Rock Band 2, Rock Band 3, The Beatles: Rock Band, Green Day: Rock Band, LEGO Rock Band, Rock Band Blitz e Rock Band: Unplugged) publicou o seu último tema descargable, que non foi outro que a canción American Pie de Don McLean, na que fálase do “día no que morreu a música” (en referencia ao 3 de febreiro de 1959, cando faleceron nun accidente aéreo Buddy Holly, Ritchie Valens e J.P. The Big Bopper Richardson).
Esta franquía nacida en 2007 superou os 18 millóns de unidades vendidas en todo o mundo, os 130 millóns de cancións descargadas e as 4.000 cancións nun catálogo que foi ampliándose durante 281 semanas. Este catálogo seguirá activo durante un período sen determinar, de xeito que os servidores do xogo seguirán activos, pero deixarán de contar con persoal que se dedique a adaptar novos temas ao xogos deste recoñecible selo, e a xeito de despedida dende Harmonix publicaron un vídeo no que repasan a historia de Rock Band á vez que interpretan o seu derradeiro DLC: