Samsung comercializará discos duros con películas en 4K precargadas

Os fabricantes de electrónica de consumo están intentando que os televisores de ultra alta definición cheguen ao mercado repetindo o éxito da alta definición, pero atopan o atranco da falta de contidos en 4K, e como unha proposta para arranxar iso Samsung vai comezar a ofrecer aos compradores de televisores 4K discos duros con películas 4K precargadas a un prezo bastante prohibitivo: 300 dólares.
O primeiro lote de películas en 4K distribuídas nun disco duro de 1 Tb serán El Consejero, Noche en el Museo, X-Men Orígenes: Lobezno, G.I. Joe: La Venganza e Guerra Mundial Z, selección cunha calidade bastante discutible para especialmente para o seu goce en ultra alta definición, á que acompañarán tres documentais (non anunciados). Antes de rematar o ano Samsung lanzará outro novo lote de filmes en 4K.
Resulta bastante rechamante o prezo deste lote cinematográfico que en formato Blu-ray custaría uns 85 euros, aos que podemos sumarlle o prezo dun disco duro externo de Samsung cunha capacidade de 1 Tb (que custaría 61,50 euros) de xeito que temos que a oferta en 4K custaría máis do dobre que o seu equivalente en HD, o que non parece en absoluto razoable (especialmente ao non poder elixir as películas que entran no lote).