Telefónica faise con eyeOS no camiño de xerar máis servizos na nube e máis software libre
martes, 1 de abril do 2014
- Pau García-Milà, fundador da empresa adquirida agora por Telefónica
Telefónica
fixo pública este martes a adquisición de eyeOS, a iniciativa
empresarial catalá de computación na nube e responsábel entre
outras cousas dunha contorna de escritorio web de código aberto
(contorna do mesmo nome, eyeOS, coa que vén colaborando a operadora
dende 2010, segundo informa a propia compañía de telecomunicacións,
coa finalidade de fortalecer a súa oferta de servizos na nube para
móbiles e fomentar o software libre).
Por certo que da
experiencia de eyeOS tivemos ocasión de dar conta o ano pasado en
Vigo, coa presenza no Congreso de Novos Empresarios (AJE Vigo) de
Pau García-Milà, fundador da empresa adquirida agora por
Telefónica, quen describiu deste xeito dita contorna: unha
plataforma de nube cunha interface de escritorio baseada na Web e
que inclúe importantes recursos para a xestión da información
persoal, ferramentas de colaboración e aplicacións empresariais.
Volvendo ao acordo co
operadora, dicir que a tecnoloxía desenvolvida por eyeOS permitirá
a Telefónica “ofrecer un servizo de virtualización de escritorio
(VDI) de código libre á vez que reforzar a oferta actual de
Telefónica de SaaS cunha solución eficiente e de atractivo prezo
para a PEME e, especialmente, a Administración Pública, un sector
que conta normalmente cunha ampla base de usuarios que acceden a un
mesmo paquete de aplicacións centralizadas e xestionadas desde unha
mesma plataforma”. Ademais, eyeOS posibilitaralle “mobilizar
aplicacións legacy de cara ás empresas, unha tecnoloxía que
deixa marxe a Telefónica para brindar solucións integrais e
axustadas ás necesidades do cliente baseadas en software libre e
capaces de competir con outras propostas comerciais”.
Para a compañía de
telecomunicacións, a adquisición é “un paso máis na estratexia
tecnolóxica de de impulso de solucións de programación libre como
Firefox VOS, o proxecto promovido xunto á Fundación Mozilla, ou
WebRTC, a tecnoloxía aberta que permite as comunicacións de audio e
vídeo a través de internet e que lidera TokBox, a compañía
adquirida por Telefónica en 2012”. Ademais, en palabras do propio
Garcia-Milà, o acordo amosa “a vontade da compañía por traballar
con iniciativas empresariais creativas a prol da innovación,
buscando tamén o talento e as mellores ideas fóra da súa
estrutura”. E engadiu: “Trátase dunha moi boa nova porque
permitirá a eyeOS non só consolidar e ampliar a súa proposta
tecnolóxica senón tamén facela máis internacional aproveitando a
rede mundial de Telefónica”.
Segundo explica
Telefónica, eyeOS manterá a súa sede na capital catalá onde
seguirá traballando un persoal composto por un equipo de
profesionais altamente cualificados que pasará a formar parte da
operadora. Pola súa banda, Pau Garcia-Milà seguirá vinculado aos
procesos innovadores da compañía que fundou, aínda que de xeito
externo.
Lembrar que ámbalas
compañías veñen colaborando desde 2010 cando traballaron xuntas no
desenvolvemento da versión 2.0 do escritorio web eyeOS. Ademais, en
setembro pasado reforzaron a súa relación coa sinatura dun acordo
para potenciar a virtualización de aplicacións Windows ou Linux nun
formato HTML5. “Trala súa integración en Telefónica, eyeOS
seguirá funcionando como unha subsidiaria independente e dirixida
polo seu actual CEO Michel Kisfaludi”, conclúe a operadora.