Un novo monitor de LG conta con soporte ergonómico e funcións de Smart TV

venres, 21 de outubro do 2022 Marcus Fernández

Para os usuarios que precisan dun monitor 4K e dun televisor para un espazo reducido teñen interesantes opcións como o novo LG Smart Monitor 32SQ780S, un monitor de 31,5 polgadas que integra webOS22 para gozar de funcionalidades de Smart TV e que tamén inclúe un soporte ergonómico que incluso permite xirar a pantalla 90 graos, de xeito que temos un produto moi versátil que quere chegar ao mercado como unha alternativa económica do Samsung Smart Monitor M8.
Este monitor de LG, que nos EE.UU. ten un prezo recomendado de 499,99 dólares, pode utilizarse como se fose un televisor (incluso é compatible co Magic Remote de LG), presume de resolución 4K, grazas a webOS22 pode correr numerosas aplicacións e incluso é compatible con AirPlay 2 para poder amosar contidos dun iPhone en pantalla.
A súa conectividade é bastante completa, de xeito que conta con porto LAN, 3 portos USB de tamaño completo, 2 portos HDMI e incluso un porto USB-C, polo que pode resultar moi práctico para poder conectarse a certos equipos portátiles que incluso poden recibir carga a través deste tipo de conexión (até un máximo de 65 watts).
Non estamos ante un monitor especialmente avanzado, pero pode resultar moi práctico para quen teña pouco espazo e queira ter unha única pantalla para traballar, xogar e consumir contidos audiovisuais.

O soporte ergonómico do monitor permite incluso xirar a pantalla 90 graos, o que resulta atractivo para moitos profesionais

PUBLICIDADE