Uncharted 3 abre a súa beta multixogador a todos os usuarios de PS3

Os usuarios de PlayStation 3 poderán gozar dende hoxe é ata o vindeiro 13 de xullo da versión de proba multixogador do xogo Uncharted 3: La traición de Drake, que xa está dispoñible na PlayStation Store e que terá durante os vindeiros días contido e modos de xogo que irán cambiando (precisamente para poder probalos).
Principalmente a beta de Uncharted 3 contará cos modos de xogo de duelo por equipos (5 contra 5), todos contra todos (a 8 xogadores), saqueo (capturar o tesouro en 5 contra 5), duelo de tres equipos (3 equipos de 2 membros competindo), obxectivo de equipo (táctico, orientado a tarefas en partidas de 5 contra 5) e apostas; amais tamén farán acto de presenza 3 modos cooperativos: Arena (sobrevivir a 10 asaltos contra a intelixencia artificial inimiga), Aventura e Cazador (o xogador e un amigo poderán colaborar coa intelixencia artificial para cazar a dous heroes).
Esta demo estaba dispoñible dende o pasado 28 de xuño para os usuarios que mercasen o xogo Infamous 2, pero agora está dispoñible para todos os usuarios e, ao estar dispoñible por un tempo limitado, recoméndase unha pronta descarga.