Unha app para drons de estudantes da UVigo faise co premio do segundo Hackathon Teleco 5G
venres, 3 de decembro do 2021
DroneLink,
unha aplicación que facilita o control remoto dos drones, é o
proxecto gañador do segundo Hackathon Teleco 5G, unha
competición organizada no marco do Plan Nacional 5G Teleco Vigo en
colaboración con Red.es, as empresas Orange, Cinfo, Gammera Nest,
Optare Solutions e Ancora Mobile, e o centro de investigación
AtlantTIC.
Segundo
informou a Universidade de Vigo, esta semana desenvolveuse a xornada
de peche da competición e nela o equipo gañador, composto por Aarón
Granja, José Manuel Rúa e Javier Otero, estudantes de cuarto curso
do Grao en Enxeñaría de Tecnoloxías de Telecomunicación,
presentou e fixo unha demostración desta aplicación móbil, unha
ferramenta que facilita o control remoto e telemetría dun UAV
(vehículo aéreo non tripulado) a través da rede 5G de Orange,
achegando amais a posibilidade de proxectar en tempo real a
telemetría nunha terminal que permita a execución da aplicación.
Nesta
segunda edición do hackathon o reto tecnolóxico puxo o foco
en empregar as redes 5G para desenvolver novas aplicacións para a
Industria 4.0. A xornada de peche foi no salón de graos da Escola de
Enxeñaría de Telecomunicación e emitiuse por streaming.
Presentada por Santiago Rodríguez, da firma galega Optare Solutions,
o programa arrancou cunha charla de Felipe Gil, investigador do
centro vigués AtlantTIC (UVigo), quen salientou algunhas das
vantaxes das redes 5G nos procesos de industrialización, como pode
ser unha maior flexibilidade na produción grazas a aspectos como a
descentralización da toma de decisións. Presentou ademais diversos
casos de uso nos que destacou as principais aplicacións e retos
tecnolóxicos da 5G no ámbito industrial.
Tras
a intervención de Gil, Alexandre Bastos de Ancora Mobile abordou o
impacto do 5G na Industria 4.0 destacando tamén as principais
funcionalidades clave ou “pancas de valor” desta tecnoloxía como
a monitoraxe cun número masivo de dispositivos ou a asistencia
remota ao traballador, o que “supón unha optimización de recursos
e unha maior produtividade”.
Luis
Rey, da asociación Ineo, centrou a súa exposición nos retos da
dixitalización desde a industria salientando algúns deles como a
cultura empresarial, a escaseza de talento ou persoal cualificado, a
incomprensión da Industria 4.0, a ciberseguridade, a necesidade dun
marco xurídico e normativo ou as barreiras económicas da
transformación dixital, da cal considera que “é un medio, non un
fin en si mesmo”.
Pola
súa banda, Luis Martínez Suárez, de Digital Hunter, afondou no
espectro para redes privadas móbiles en 5G, detallando as “bondades”
que teñen para multitude de sectores e destacou “que se trata dun
mercado para o cal se estima un crecemento dun 60% nos próximos
cinco anos”.