Unha empresa galega crea a primeira calculadora de soldos para móbiles Android e iPhone
xoves, 7 de xaneiro do 2010
A exitosa web galega www.calcularsueldoneto.com, da
que falamos en Código Cero por ter recibido máis de
40.000 visitas nun só mes, volve a ser nova a destacar na nosa web por dar
o salto a telefonía móbil e converterse nunha aplicación dispoñible case dende
calquera punto da xeografía.
E é que a idea de calcular o soldo neto
que se instalou hai uns anos en Internet, vén de adaptarse agora ao sistema
operativo de Google para teléfonos móbiles, Android, converténdose así na
primeira calculadora de soldos do mundo dispoñible no market place de Google.
Xa dende o pasado mes de outubro, esta
ferramenta informática foi valorada moi positivamente (co máximo da puntuación,
cinco estrelas) polos propios usuarios de teléfonos Android e grazas a esta “excelente acollida”, Adiante Ventures
pasou a adaptar esa mesma aplicación para teléfonos iPhone a un prezo de 0,79
euros, acadando un gran número de descargas durante o primeiro mes de
lanzamento.
A aplicación, ao igual que a web do mesmo
nome, proporciona un cálculo do soldo neto mensual a partir do soldo bruto
anual en España. Con datos actualizados a IRPF 2009, os usuarios poden
consultar a nómina de maneira rápida a partir das características máis
habituais dos traballadores ou de maneira máis precisa se se inclúen os
detalles persoais de cada usuario.
Os resultados, ademais de mostrar o
soldo, mostra outros datos como a retención do IRPF ou da Seguridade Social.
Asemade, e xa pensando nos usuarios de
iPhone de todo o mundo, a mesma empresa vén de publicar Net Salary, outra calculadora que lle permite ás persoas usuarias
calcular o soldo neto nos 24 países máis importantes do mundo e en 15 divisas
diferentes, unha ferramenta que, segundo veñen de anunciar os seus creadores, “moi pronto estará dispoñible tamén para
teléfonos Android”.
Na imaxe, as aplicacións Calcular Soldo Neto para Android e para
iPhone.