Unha tese da Universidade de Vigo, premiada na convención de produtos electrónicos máis importante do mundo
martes, 20 de marzo do 2012
- Bravo, no centro, xunto cos seus directores de tese, Martín López Nores e Yolanda Blanco
Vivindo como
vivimos no que se coñece como Sociedade da Información, non é raro comprobar
como nos últimos anos todo está deseñado de maneira que mellore a nosa
comunicación. Os móbiles, os ordenadores, os tablets, os GPS, a Rede, os
vehículos... (e toda a tecnoloxía que os complementa) están pensados para que
cada vez sexa máis doado comunicarnos cos demais sexa cal sexa a nosa situación
no mapa ou no tempo.
No caso dos
vehículos, hoxe falamos dunha tese de doutoramento xerminada na Universidade de
Vigo que mellora as nosas necesidades de comunicación alén das urxencias,
conectando entre si os automóbiles que se desprazan por rúas e estradas.
Esta tese do
investigador Jack Fernando Bravo, vén de ser premiada no congreso de
electrónica de consumo máis importante do mundo, celebrado nas Vegas, e propón
unha serie de melloras para a comunicacións en redes vehiculares que, entre
outras cousas, permite realizar chamadas e enviar sms entre usuarios dunha mesma rede para avisar en tempo real do
que sucede nas vías.
Os
directores de tese, Martín López e Yolanda Blanco, do grupo de investigación Servizos para a Sociedade
da Información, que colaboran con Bravo na mellora e perfeccionamento deste
proxecto, indican que a principal vantaxe deste sistema con respecto ás redes
de telefonía e satélite “é que é de
balde, xa que a conexión realízase directamente entre vehículos e non precisa
dunha infraestrutura fixa”, aclararon.
De feito, o
sistema pode soportar conexións de certa calidade a Internet e conversacións
telefónicas entre vehículos a pé de estrada, “sen necesidade de recorrer ás redes de telefonía, é dicir, de xeito gratuíto”,
afirma Martín López. Isto permite que as redes vehiculares, baseadas na
comunicación directa entre vehículos, poidan ofrecer servizos a un custe menor
que o das redes de telefonía móbil e por satélite.
O sistema
deseñado por Bravo, afirman
no DUVI, emprega mecanismos baseados nos sistemas automáticos de transporte
público e privado, nos avances nos sistemas de información do tráfico en tempo
real e nas novas políticas para compartir información e transporte entre
usuarios con destinos similares.
O feito de
ter recibido este premio supón unha garantía para que este grupo de
investigación siga a perfeccionar o sistema de comunicación en redes
vehiculares, do que xa existían investigacións previas, porén o seu
desenvolvemento freouse debido á alta mobilidade e á variabilidade do tráfico,
que reduciron o seu uso a mensaxes de seguridade entre usuarios da Rede.