A Cámara de Santiago móstranos nun novo seminario en liña como protexer o noso espazo dixital

A Cámara de Comercio de Santiago vai organizar este mes de febreiro un seminario en liña con recursos básicos e de gran utilidade para protexer a vertente dixital da nosa empresa ou actividade profesional. Trátase da xornada Ciberseguridade simplificada, protexe o teu espazo dixital. Aproveita o Kit Dixital. Será o 21 de febreiro en horario de 10.00 a 11.30 horas. Ao abeiro da sesión, presentarase a Oficina Acelera Peme da Cámara de Comercio de Santiago e Red.es.
A nivel de contidos, abordarase o significado e a implicación actual da ciberseguridade, os tipos de ciberseguridade (Rede, nube, IoT, datos, aplicacións), os tipos de ameazas en liña e como previlas (malware, enxeñería social, phishing, suplantación, Ddos…) e exemplos de medidas e boas prácticas en ciberseguridade que podemos pór en práctica para protexernos tecnoloxicamente.
O relator será Camilo Ameijeiras, licenciado en Ciencias da Comunicación. Experiencia como docente e como xestor empresarial, sendo fundador e director executivo (CEO) de Primate Multimedia Ibérica, SL, empresa de desenvolvemento web, móbil e deseño gráfico; e de Fittingpup, SL, empresa de monitoraxe de saúde para mascotas.
Esta xornada está organizada pola Oficina Acelera Peme para o Kit Dixital da Cámara de Comercio de Santiago de Compostela.
As Oficinas Acelera Peme para Kit Dixital postas en marcha por Red.es, entidade pública adscrita ao Ministerio para a Transformación Dixital e da Función Pública, a través da Secretaría de Estado de Dixitalización e Intelixencia Artificial, coa colaboración de Cámara de España, teñen como obxectivo impulsar a transformación dixital das pequenas e medianas empresas, micropemes e autónomos. As actuacións, están financiadas polo Plan de Recuperación, Transformación e Resiliencia a través dos fondos NextGenerationEU, no marco da axenda España Dixital 2026 e o Plan de Dixitalización de Pemes 2021-2025.