A Casa de Campás amosa como converter en dixital unha empresa ou ONG “analóxica”
xoves, 10 de marzo do 2016
A Casa
das Campás (Campus de Pontevedra) está a acoller estes días un
curso sobre como contribuír a dixitalizar da maneira máis axeitada
posíbel empresas, entidades e organizacións sen arela de lucro.
O punto básico do obradoiro é amosar a orixe e os procesos da
transformación dunha actividade á que estamos afeitos a ver en
clave “analóxica” ao eido en liña. O curso, impartido pola
xornalista Jose Piñeiro (doutora en Investigación en Comunicación
pola UVigo), desenvólvese baixo o seguinte epígrafe: Dixitalización
de negocios para PEME e ONG. Está
a participar nela (dende febreiro) unha ducia de persoas, afondando
en cousas tan variadas e específicas como por exemplo a creación
dunha tenda virtual ou como xestionar provedores ou facturas coa
axuda das TIC. Ou, tamén, como pór en marcha novos espazos de
comunicación máis áxiles e accesíbeis.
Un dos eixos
deste taller de 30 horas de duración é achegar ao alumnado a unha
serie de ferramentas e recursos de balde que, no caso das empresas,
permitiranlles “estar preparadas para a contorna que xa está a
envolvelas, entendela e ser capaz de operar nela”, sinala a
profesora Piñeiro, que tamén salienta a importancia outorgada ás
TIC no que “na Unión Europea se denomina a Cuarta Revolución
Industrial”. Entre outros moitos obxectivos, o curso abrangue un
desafío concreto: facer posíbel que o alumnado leve á práctica os
coñecementos adquiridos durante a estadía formativa. Ou sexa, que
os participantes arrinquen “cun proxecto dende cero”. A idea,
sinala Piñeiro, “é que cada alumno faga o seu proxecto, porque
desta maneira exploramos máis posibilidades e aprendemos a partir de
distintos modelos”.