A Clínica Cobián achega aos seus usuarios a tecnoloxía de comunicación avanzada de ClepIO
luns, 4 de xaneiro do 2016
Os responsábeis de
ClepIO, ferramenta para a autoxestión
de contidos de saúde, veñen de asinar un acordo de integración coa
Clínica Cobián da Coruña,
centro referencial galego no ámbito da atención xinecolóxica e da
nenez. Esta alianza, sinalan dende ambas empresas, permitirá a todos
os usuarios de ClepIO que acudan a este centro dispor de toda a súa
información de saúde “de forma automática e accesíbel nos seus
móbiles, tabletas ou PC e sen necesidade de introducir os datos
manualmente”.
O obxectivo da Clínica
Cobián con esta aposta pola dita tecnoloxía avanzada é “dar un
paso firme na optimización da comunicación entre pacientes e
médicos de maneira que se estableza unha relación enriquecida de
forma automática en ambos os sentidos, entre o rexistro persoal de
saúde do paciente e a súa historia clínica no centro”. Este
labor de optimización da comunicación abranguerá accións
concretas como o almacenamento seguro na plataforma ClepIO de toda
información que se xere da saúde de nai ou do bebé: imaxes de
ecografías, resultados de analíticas ou informes médicos, entre
outros. Todos estes contidos estarán a disposición do paciente para
a súa consulta cada vez que o desexe.
ClepIO posibilita,
ademais, recibir notificacións no móbil para avisar cando e como se
debe tomar un medicamento ou que día hai que asistir a unha cita. Ao
mesmo tempo, permite subir anotacións e fotografías propias sobre a
evolución de calquera doenza, xestionar as citas dos cativos e o seu
calendario de vacinas. Segundo o doutor Fernando Cobián, “esta
iniciativa sitúa á nosa clínica á vangarda no uso de innovacións
tecnolóxicas para a mellora da saúde”. E engade: “Cómpre ter
en conta que as novas xeracións de pacientes que acoden ao noso
centro utilizan a diario os móbiles e os dispositivos medidores de
parámetros de saúde, e os profesionais non podemos ficar atrás
desta realidade”.